Tu kaun hai!

Tu kaun hai...

Mere dil se pooch,
har dhadkan mein naam hai tera.
In aankhon se pooch
jisme intezaar hai tera!

Pooch in raaton se jo,
jaagti hain mere saath!
in barsaat ki boondon se
jism se jo takraati hain !
Bayaan karengi vo lamhen
jinme intezaar hai tera!

Uss aaine se pooch,
jisse baantati huu.N tanhaai apni.
aur pooch uss chadar se
jise intezaar hai silwato.N ka!

Pooch unn khayalo.N se
jo uljhe rahte hain lamha lamha tujhse!
Pooch is zindagi se
jo tere bin, ek sifar si mehsoos hoti hai.

(c) Archana Bora